sábado, 25 de xuño de 2016

Torta semifría de Petit-suisse

Adiante coas receitas e adiante coa fin de semana horrorosa de tempo polo norte mais moi festiva debido ao San Xoán. Como xa sabedes de anos anteriores, aquí por Covas andamos de festexos nestes días e cando hai festa xa asociamos directamente a unha alegría para o bandullo. Efectivamente, e ademais, aquí aproveitamos para argallar con novas receitas e tentar así sorprender aos/ás comensais.
Centrámonos na sobremesa. Nestas xornadas de extenso xantar, queda un espazo moi reducido para a larpeirada final. Por iso quixemos preparar algo suave e fresco, capaz de por un peche harmonioso ao menú. E isto foi o que se nos ocurriu. Unha torta a partir dos benqueridos petit-suisse que tantos deixamos desfrutados na infancia e aínda non tan atrás no tempo.
Con ela celebramos o San Xoán de Covas e con ela quedamos coa dozura necesaria nestes días chuviosos e escuros. 
Aí vai, atent@s!


Torta semifría de Petit-suisse


Ingredientes (para un molde de 30 cm):


Para a base:
  • 300 gr de galletas dixestivas
  • 90 gr de manteiga
  • 90 gr de marmelada
Para o recheo:
  • 18 Petit-suisse
  • 600 ml de nata
  • 300 gr de azucre
  • 9 láminas de xelatina neutra
Para a decoración:
  • 250 gr de amorodos
  • 150 gr de chocolate con leite
  • 50 gr de chocolate negro

Utensilios: unha picadora, dúas ou tres cuncas grandes, un molde desmoldábel de 30 cm, dúas ou tres culleres, un batedor manual e un cazo. 


Elaboración:

Para comezarmos temos de facer a base da torta. Para iso, trituramos as galletas na picadora (ou cunha bolsa e un rolete) e mesturámolas coa manteiga derretida e a marmelada. 



Mesturamos moi ben e estendémola sobre a base do molde. Refrixeramos mentres facemos a crema. 


Poñemos a remollo en auga fría a xelatina neutra e deixámola repousar 5 minutos. De seguir, collemos un pouco da nata e quentámola nun cazo sen que chegue a ferver. Botamos a xelatina e removemos até que se desfaga totalmente. Retiramos do lume e botamos un chisco máis de nata para que arrefríe; reservamos.



Mentres arrefría a mestura anterior, mesturamos o resto da nata cos petit-suisse e o azucre. 



Cando estean integrados, engadimos a nata mesturada coa xelatina. Quedará unha crema de cor rosa clariña; se queredes que teña unha cor máis intensa, podedes engadir un chisco de colorante (nós non o tiñamos na casa e deixámola así).


Botamos a mestura sobre a base de galleta e refrixeramos, como mínimo, 4-5 horas, aínda que é mellor se a deixamos repousar unha noite enteira. 


Para facer a decoración, temos de cortarlles o tallo aos amorodos e lavalos ben, deixamos que sequen mentres derretemos o chocolate con leite no microndas ou ao baño maría.


Bañamos os amorodos no chocolate e colocámolos sobre un prato ou unha fonte. Refrixeramos mentres calla a torta.



Pasado o tempo de repouso da torta e dos amorodos, colocámolos sobre a torta.


Derretemos o chocolate negro e facemos debuxos coa axuda dunha culler. Deixamos que endureza este chocolate no frigorífico e xa estaría preparada para comer! 


Non sabedes canto nos prestou esta torta. Bon, e aínda nos vai prestar, que quedan dous anacos no frigo, agardando a ser devorados. Agora que veñen mil e unha festas, recomendamos anotardes ou gardardes esta receita pois supón unha escolla lóxica para concluír menús fortes típicos de celebracións. Nós quedamos encantados! A saborear! :-)

Ningún comentario:

Publicar un comentario