Carne asada con verduras

Martes 14 de abril, nova receita. Sempre dicimos que en Bolboretas no bandullo intentamos dar cabida a todo tipo de receitas, desde as máis innovadoras e atrevidas até as tradicionais, de sempre; ás do país e ás doutras nacións; ás máis sinxelas e rápidas e ás que son algo máis duradeiras no tempo e complexas... 

Así pois, hoxe presentámosvos un prato destes que con seguridade nunca falta en ningunha casa, mais que, non tendo moi claro o motivo, ás veces fica fóra dos pratos elaborados polas novas xeracións. Adoitan facer a carne asada os avós ou avoas e os pais e nais, mais se quixermos seguir degustando é mellor ir aprendendo a facer.

Talvez non sexa tan atractivo como algún outro aínda que dificilmente imaxinamos a nosa alimentaicón sen a carne asada, excepto @s que xa non gustan da carne, claro. Esta receita nada novo dirá para moitísimas persoas que levan anos e anos preparando pratos coma este. Porén, cremos que si pode ser de axuda para animar a persoas que lle teñen respecto a estes clásicos. Con pouquiños pasos e unha boa carne, lograredes terdes un menú saborosísimo e moi nutritivo. Ademais, de seguro que vos sentides mellores e máis competentes despois de o preparardes.

Carne asada con verduras

Ingredientes:

• 1 kg e medio de carne tenra de porco 
• 2 cenorias
• 1 pemento vermello
• 1 cebola
• 3-4 dentes de allo
• 1 vaso de viño branco
• 1/2 vaso de Brandy
• Aceite
• Estragón
• Pementa moída
• Sal

Utensilios: coitelo, vaso, fonte para forno.

Elaboración:

Para comezarmos, temos de cortar a nosa carne en anacos. Para esta receita debemos escoller unha carne branda e moi tenra como o lacón, o solombo, xamón etc. De seguir, adobámola para que estea máis saborosa. Para iso, botámoslle o estragón, a pementa moída e o sal ao noso gusto; tamén, engadimos os allos picados e dúas ou tres culleradas de aceite. Mesturamos ben e deixamos repousar mentres preparamos o resto dos ingredientes (aínda que se o facemos dun día para outro terá máis sabor. 

A continuación, picamos as cenorias, a cebola e o pemento e colocámolos no fondo da fonte en que imos facer a carne. Se queremos, podemos engadir un chisco de sal e pementa moída. 

Despois, colocamos a carne sobre as verduras e agregamos o viño branco e o Brandy. 

Enfornamos a 180º-190º (o forno debe estar prequente), calor abaixo e co gratinador, durante, aproximadamente, 1 hora 40 minutos. Lembrade que a media cocción debemos darlle a volta á carne. 

Xa vedes, que sinxelo! Que prato tan digno e que pracer comelo... Aquí deixámosvos unha posibilidade, mais igual que sempre vos recomendamos cos clásicos, o mellor modo de o preparardes é demandándolle aos expertos da vosa casa un par de consellos. Seguro que vos son de moitísima utilidade e lle dan un salto de calidade ao voso prato. A fin de contas, @s que máis saben son aqueles/as que levan anos e anos alimentando unha familia :-) Unha forte aperta bolboreteir@s, pasade bo martes!